Dylan & Krog & Ek & Jy

Dylan is wys met die straat
ek dink aan skooltyd met Krog
iets daarin het met my gepraat
nou maak hy sý woorde gesog

so raak ons net vetter en ouer
alweer op die nostalgiese spoor
stoom voort – stadig en kouer
waar's jy vanaand om my te hoor

op ‘n wit skoolbank in die 90s 
oranje nog in jou ouers se are
die wagte is verander met iets
wat lyk soos Jakob – die ware

maar die ponie het oorgeneem
in die harte van hul Totius
die wagte in hul torings seën
met leuens op ons skouers

hou op huil vir nou of die verlede
alles vals sal verkrummel in puin
jou lot word gehoor in gebede
trompette sal luid uitbasuin






© Niel De Waal Meiring